La Baía es una antica festa pagana richa de simbols liats al renaisser e a la fertilitat, ente decò lhi personatges femenils son empersonats da òmes, e qu’en lhi sècles a sobrepausat decò la valor istòrica de la fòrabanda di Sarrasins da las valadas. Quarqu’una en lhi sècles es estaa transformaa da la cultura cristiana en procession sacra per lhi sants, coma a Limon, Chastelmanh, Festiona, Sambuc, Celas, Chanuelhas; an gardat lor valor profana originaria aquelas de Sant Pèire e de Blins (ent’es dicha Beò) en Val Varacha. Lo cortèu navisa aquel de lhi antics Carnavals, emè Espós, Vielhs, Turcs, e decò un còrp militar format da lhi Alums, guidats da lhi Abats. Per tot lo país venon plaçaas de barrièras formaas da bilhons, que venon esclapaas emè d’àpias.