Quals son lhi territòris ente es parlat l’occitan?
L’Occitan es parlat en Espanha (Val d’Aran), França (Alvernha, Gasconha, Lengadòc, Lemosin, Delfinat, Provença) e en Italia (14 valadas en provincia de Turin e Coni, e de mai 2 comunas en provincia de Imperia e a La Guardia en Calabria).
Quantas personas parlon l’occitan encuèi?
Dins las regions de lenga occitana vivon 12 milions de personas: entre aquestas a pauc pres 2.000.000 parlon o comprenon l’occitan: 7.000 en Espanha, 70/90.000 en Italia e la resta en França…
Qualas son las estructuras de referencia per l’occitan?
En França lo CIRDOC, Centre interregional de desvelopament de l’occitan, plaçat a Beziers, arquivi de publicacions e documents diferents. A nivèl institucional l’associacion I.E.O., Institut d’Estudis Occitans, que s’òccupa de publicacionis manifestacions e espectacles, embe seccions regionalas dins tot lo territòri de lenga d’òc. En Italia la seccion de l’I.E.O. es Ousitanio Vivo, e coma associacion publica lhi a l’Espaci Occitan, Associacion de publicas administracions (Comunas e Comunitats de Montanha) del territòri occitan alpin.
Occitan e provençal son la mesma causa?
L’Occitan es una granda lenga embe nombrós dialectes: se pòlon individuar doas grandas familhas, aquela mesjornala que comprend las varietats Lengadociana, Gascona (que comprend decò l’Aranés) e Provençala e aquela septentrionala que comprend Alvernhat, Lemosin e Delfinatés (o Vivarés, de la quala fan part decò lhi dialectes occitans d’Italia). Donc lo provençal es un di dialectes de l’occitan; dins quarque luec decò la varietat parlaa dins las valadas es definia provençal, en relacion ai rapòrts culturals e econòmics que dempuèi secles an liats las valadas alpinas a la Provença. Mas dal costat linguistic aquò es pas correcte, perqué per exemple lhi provençals dion , “can” e “galina”, e lhi alpins al contrari dion “chan” e “jalina” coma en Lemosin o en Alvernha.
Lhi estats ente l’occitan es present tutelon aquesta lenga?
En Espanha l’occitan es estat reconeissut coma lenga co-oficiala dins lo 1979. En Italia aquò s’es passat dins lo 1999; al contrari en França aquesta lenga es consideraa “regionala” e a pas de leis especialas.
Qualas autras minoranças linguisticas son presentas en Italia?
En Italia son presentas las minoranças allemana, francesa, albanesa, grecanica, occitana, catalana, furlana, ladina, eslovenca, croata, franco-provençale, sarda.