Luns 13 de junh a 21 oras Matteo Zenatti a Draonier
Seguir lhi pas di trobadors qu’entre 1100 e 1200 eron arribats en las corts del Piemont. Aquesta l’idea naissua drant d’la pandemia da la bigalhaa fantasia del veronés Matteo Zenatti, tenor madrigalista, ensenhaire de chant antic, actiu en importantas formacions vocalas de musica medievala en Italia e fòra. Ental 2021, per cas, començava via Twitter un eschambi de messatges entre Espaci Occitan e Zenatti, entencionat a conciliar lhi lòngs estudis sal repertòri trobadòric abo lo plaser de chaminar en vir, arribant fins al Marquesat de Bonifaci I del Montferrat; enti siei chastèls arsonavan las chançons de Raimbaut de Vaqueiras, aicì per ben 11 ans, e de Gaucelm Faidit. L’idea de Zenatti era aquela d’arpoponer las musicas escrichas da Raimbaut e Gaucelm, e a travers aquelhi antics componiments rescontrar de novèls ascoltators en de pòsts fòravia, fòra da las salas da concèrt. Es naissua parelh l’idea d’organizar un chamin a travers las tèrras del Montferrat per reveire lhi pòsts de Bonifaci, arpistant sias peaas, e demandar auberge, pròpi coma fasion lhi trobadors, en paga des chançons chantaas e sonaas abo l’arpa.
L’Espaci Occitan a ben apreciat la propòsta originala e la competença de Zenatti, e lhi a semonut de començar son chamin pròpi da Draonier, qu’abo l’Institut d’Estudis Occitans rapresenta totas las valadas de lenga d’òc.
Com’aquò gracias a internet Zenatti a organizat un percors, una performance sonaa Trovatore in transito, que farè a pè, abo sac e arpa reconstruïa da miniaturas del Dui Cents, se meirant e ufrent un espectacle lo ser. Una performance al jorn, entre provincia d’Coni e Montferrat: en tot 170 km, mai o menc 17 al jorn.
Lo viatge de Matteo Zenatti començarè luns 13 de junh da Draonier, ente chantarè en la Confraternita del Gonfalon, en Via XXV Aprile, a 21 oras; ental concert, organizat da l’Espaci Occitan, presentarè las mai famosas composicions de Raimbaut de Vaqueiras e Gaucelm Faidit, e la lectura d’la vida (biografia) e des razos (motius del componiment), textes del 1300 en lenga d’òc. L’apontament fai part del projèct de l’Union Montana Val Maira realizat abo lo sostenh de la Presidença del Conselh di Ministres - Dipartiment per las questions regionalas e las autonomias” ai sens de la L. 482/99 an 2020.
Lo matin d’après Zenatti partarè a pè per arribar a Busca, ente chantarè lo 14 de jung a 19 oras a las Serras Monumentalas del Chastèl del Ròcol gracias a l’Associacion Castello del Roccolo aps. Lo 15 de junh serè a Saluces ent’un concert organizat abo Terres Monviso, e lo 16 a Savilhan (seraa a cura de Giovanni Badino, guida naturalistica). Arribarè après a Bra, e traversant lo Roero e la provincia d’Ast devaria arribar lo 25 de junh a Casal, truchant simbolicament la cort de Bonifaci I.
Aquesta seconda part de percors serè companhaa da Simone Cunego, videomaker e excursionista, mas qui vorguesse companhar Matteo decò mec per un pichòt tòc en lhi jorns precendents serè lo benvengut.
Lo projèct de Zenatti se pòl seguir si siei social Fb e Tw @matteozenatti, Ig @matteozenattimusic e sal blog https://www.matteozenatti.net/trovatore-in-transito/ .
Tuchi lhi concerts de Matteo Zenatti serèn gratis; per lo 13 de junh chal portar la masquerina FFP2. Informacions en cò de Espaci Occitan, tel. 0171.904075, segreteria@espaci-occitan.org.