Rescontres literaris en Val Maira

Arribon decò a lulh lhi rescontres literaris de LIBRES LIBRES – libri liberi, iniciativa d’Espaci Occitan realizaa abo lo sostenh d’la Region Piemont.

Sande 13 de lulh a 17 oras a Estròp, en cò d’la Sala Pro Loco del Morinés, Diego Anghilante presentarè Grido e controgrido. Il canto popolare raccontato dal di dentro, publiat aqueste an da l’Araba Fenice. Chantar en companhia mas pas ent’un còro, en manièra libra abo lauraires e montanhòls que uchon desbrasamats. Consideracions antropològicas, musicològicas, politicas e filosòficas naissuas a l’entorn del chant polifònic, rite comunitari; argument arrambat pas coma estudiós forestier, mas uchant abo l’Autre.
Diego Anghilante, d’Sant Peire, es professor de filosofia e istòria ent’un Licèu d’Coni. A publiat diferents libres e film- documentaris dediats a la cultura e ai problèmas d’la montanha occitana. Devisarèn abo l’autor Silvio Peron, musicista e estudiós del repertòri tradiccional, e Francesco Tomatis, filòsof.

Jòus 25 de lulh a 21 oras a Prats, en cò del Musèu del charbo e del trabalh des fremas serè presenta Lidia Dutto abo Se nasce femmina piange la formica - Maternità e nascita, femmine e maschi nella tradizione popolare di un'area alpina, publiat da BBEuropa ental 2018.
Una recercha sus l’enfantar e lo naisser en la Val Pes, un monde cultural comun a totas las valadas alpinas, realizaa abo entrevistas a ancians informators sus l’esser en condicions, pòsts e tecnicas per acochar, lachar, butar a beila, fins a las praticas segretas per avortar.
Lidia Dutto, enterpreta e traductritz d’la Clusa, fai recercha endipendenta d’Etnografia rurala alpina e a escrich estudis e publicacions sal patrimòni cultural des valadas de Coni, sustot d’la Val Pes. Devisarè abo l’autritz Rosella Pellerino.

Lhi apontaments continuarèn a avost: Jòus 1° d’avost a 21 oras, l’Institut d’Estudis Occitans d’Espaci Occitan a Draonier atend Marinella Peyracchia abo son darrier libre Pionieri d’oc, gli anni Ottanta nelle valli del Viso. Sande 10 d’avost a 18 oras apontament ai Techs de Draonier, en las Ex Escòlas Elementaras, ente Luciana Navone presentarè lo romanç Refoli di vita, una storia di famiglia ai Tetti di Dronero. Venre 23 d’avost a 21 oras apontament encara a l’Espaci Occitan de Draonier abo Nicola Pettorino e L’animale (che mi porto dentro). Devisarè abo l’autor lo collaborator de La Guida Marco Campagna 

Tuchi lhi apontaments son gratis. 

Per informacions: Espaci Occitan!

Descharja lo manifestin