En l'automn 2021 arriba mai Libres libres - Libri liberi, lo programa d’Espaci Occitan realizat abo lo sostenh de la Region Piemont e dediat a publicacions en lenga occitana o liaas al mond de la cultura alpina. Aquesti lhi apontaments de novembre.
Jòus 4 de novembre 18 oras
Il risveglio dell’orso occitano. Miti e riti del selvatico alpino
Lo libre, publiat da Omega, es estat realizat da Espaci Occitan emè lo sostenh de la Region Piemont, e curat da Piercarlo Grimaldi e Fulvio Romano emè la redacion de Rosella Pellerino. Lo volum presenta lhi contributs scientifics en italian, occitan, francés e anglés di mai importants estudiós d’antropologia e etnografia: protagonista es l'ors, bestia totemica al centre de lhi antichs Carlevars occitans, da las Alps ai Pirenèus.
Jòus 18 de novembre 18 oras
Le orchidee spontanee della Provincia Granda
La darrièra òbra de Fernando Morelli e Renato Lombardo, publiaa da La Cevitou – Ecomuseo Terre del Castelmagno, es un libre emè 870 fotografias a colors dediat a un di tresòrs naturals des Alps de la provincia Granda: las mans d’la Madòna o del diaul, presentas emè 74 tipes e gropaas en 24 genres. Pichòtas, mincatant de mal veire, tendras, sovent pistaas, las orquideas sarvatjas creisson sus teèèras sechas qu’an pas valor o a l’ombra d’la boscalha.
Sande 20 de novembre 16 oras
Joanin Sopatabrinhas – Giovannino scrollaprugne
" Lhi avia un bòt un filhet que istava dins lo bòsc embe sa maire e son paire, lo boscatier. Aquel filhet anava sempre robar la frucha dins lo jardin del maschon e era talament golefre de brinhas que lo sonaven Joanin Sopatabrinhas". Caterina Ramonda, estudiosa de literatura per mainaas e autritz d’aqueste novèl volum bilenga occitan – italian, publiat da Egnatia e enrichit dai dessenhs d’Edoardo Marconi, atend mainaas e familhas per contar aquesta e autras istòrias des valadas occitanas.
Tuchi lhi apontaments son gratis e se passarèn en cò d’Espaci Occitan, Via Val Maira 19 a Draonier. Sobre lhi 12 ans chal presentar lo Green Pass. Prenotacion obligatòria a segreteria@espaci-occitan.org, tel. 0171.904075.