Istòrias en occitan abo Claudio Franco

Arriba l’istaa e sus las scènas des valadas occitanas arriba mai Claudio Franco, poliedric actor amatorial d’Aison, actiu da una detzena d’ans e darrierament protagonista principal d’la tragedia occitana Bastian Nevacho de Diego Anghilante.

Bartavelear es un espectacle legier, fach de quadres, batuas, istòrias contaas da parents e compaisans, quarqu’una tradiccionala, autras enventaas da la fantasia de Claudio o escrichas da autres autors, coma l’imaginari discors del Viscomt Bolleris d’Demont, per sorire a la bona a travers la comicitat a nòstra mòda.

En occitan bartavelear vòl dir chacharar sec, ganassear volentier, e venaria da la bertavela, la pernitz rossa (Alectoris rufa) conoissua per son vers fòrt e sensa sosta, qu’auria inspirat decò lo nom del bartavel, pichòt intrument que fasia bautear la grilha de l’enventaor, fasent un bruch enoiós e repetut.

E d’segur manca pas la bertavela a Claudio Franco, qu’abo aqueste espectacle arpilha la dralha de Reclam, cabaret presentat passa quarque an en las valadas. A far da espala a l’actor aqueste viatge serè Laura Abello.

Après lhi premiers apontaments en las valadas Maira e Estura, l’espectacle se passarè sande 6 d’avost del 2022 a 21 oras ental Salon delMusèu del Temp e des Solarias en la ruaa Celas en Blins. L’intrada es libra e gratis.

L’iniciativa es sostengua da Espaci Occitan e realizaa abo la collaboracion de la Comuna d’Blins. Per info: Espaci Occitan, www.espaci-occitan.org, segreteria@espaci-occitan.org, Fb @museooccitano, Tw @espacioccitan, tel. 0171904075 e Comuna d’Blins, tel. 017595110.