Aprés las fortunaas edicions de lhi ans passats, l’Espaci Occitan, abo lo sostenh de la Region Piemont, propon mai per l’automn la proiecion de film ideats o virats sal territòri occitan, da las valadas alla Provença.
Se comença mercre 28 d’octobre a 21 oras abo la proiecion de Bergers - Fino alle montagne, film del 2024 de la regista francesa Sophie Deraspe, inspirat a un romanç semiautobiografic. Mathyas, jove agent publicitari de Montréal, decid de laissar la vita champeiraa de la vila per retrobar lo liam abo la natura e deventar pastre ental sud de la França. Arribat en Provença sensa experiença, coneis fito la dura realitat del monde pastoral, que lhi fai butar en discussion sa vision romantica del mestièr. Lo rescontre abo Élise, jove emplegaa que cern de laissar son trabalh per lo seguir, dona un novèl gaubi al chamin de formacion del jove, que retròba confiança dins son objectiu. Lhi dui, recebut un tropèl da chadelar, parton per la transumànça e fan un viatge dins las Alps de Provença, ente se confrontarèn abo sagrins e rescontres que lhi portarèn vèrs una nòva manièra de viure en montanha. Duraa: 113 minutas.
Mercre 11 de novembre a 21 oras, tornem en Provença abo Malaterra, film francés de Philippe Carrese, realizat en 2003 da Comic Strip Production abo musicas di Massilia Sound System. En Auta Provença, al temp de la guèrra del 1914-1918, una familha formaa principalament da fremas, perque lhi òmes son al front, viu a Malaterra, vilatge abandonat e retengut maledich. L’arribaa d’un vagabond sord e mut fasarè surtir lhi conflictes individuals, bolversarè la vita d’aquela meira isolaa e revelarè lo mistèri de Malaterra. Una granda part di dialògs es en lenga occitana, varietat provençala, abo sot-titols en francés. Entre lhi actors lhi a decò Laurenç Revest, occitanista e lingüista de Gap. Per l’ocasion, lo productor del film, Thierry Aflalou, se collegarè de Marselha per un pichòt salut. Duraa: 90 minutas.
L’intraa a totas las proiecions, que sa passarèn en cò de l’Institut d’Estudis de Espaci Occitan en Via Val Maira 19 a Draonier, es libre e gratis. Per info www.espaci-occitan.org, segreteria@espaci-occitan.org, tel. 0171.904075, Fb @museooccitano, Ig @museo.occitano.
Locandina AICì

![[Translate to Occitano:] [Translate to Occitano:]](/fileadmin/_processed_/1/6/csm_LocandinaVenveire_ott-nov-2026_1de3e0181d.jpg)