Sande 26 de genier 2019 a Chastelmanh apontament Maraman abo la presentacion del libre Il Mondo di Giacomo de Renato Lombardo.
Lo second apontament Maraman de genier es presentat dal Musèu Casa Narbona abo lo Pichot Muzeou d’la vita d’isì. Sande 26 de genier del 2019 a Chastelmanh ental Salon Comunal en Piazza dei caduti 1 a Champdamolin, Renato Lombardo presentarè IL MONDO DI GIACOMO. Ciò che conta - I racconti di Giacomo e altre storie, publiat dal Centro Occitano di Cultura "Detto Dalmastro" de Chastelmanh. Un libre a pus d’una vita e las istòrias que conta finisson pas mai… Abo 288 paginas, 13 novèls capitols e de centenas de fòtos a colors, aquesta es la terça ri-edicion del libre de Jaco e, en uech ans, la quarta restampa tipografica. Lo libre de Jaco es estat la premiera experiença d’escrichura de Renato Lombardo, e lo premier libre, coma lo premier amor, se pòl pas desmentiar. Se vai anant, s’escrivon autres libres, mas aquel mincatant fai ucheta, e l'autor torna a caressear-lo. La memòria de Jaco es un territòri ente chasque pèira estrema una istòria. Las seras d’uvern, ai Margaria d’la Ròcha, ent’una delanda de recòrds, transmigracions e memòrias, naisson de contes de vita, pichòtas istòrias de gent comuna, coma aquelas de Jaco Inaudi, lo calcolator prodigiós, e de Marcèl, dich Pola, lo cambrier del Titanic. Istòrias veras, da ren creire, liaas a de vicendas epocalas, que Jaco conta sensa perder-se en l’imaginari e en la legenda. Lhi recavats d’la venda d’aqueste libre serèn destinats a l’Associacion IL FIORE DELLA VITA ONLUS, qu’ajua a financiar las activitats del repart de Pediatria de l’Espidal d’Savilhan, sostenent las familhas des mainaas recoveraas. Renato Lombardo, après 33 ans passats a Pradievi drant coma Doctor e puèi come Medic de Medicina Generala, despuei 7 ans es en pension e ista a Caralh. Despuèi mai de 40 ans fai de recerchas etno-antropològicas e naturalisticas en las valadas alpinas sud-occidentalas, sustot las valadas Maira, Grana e Estura. A publiat: Ciò che conta. Le storie di Giacomo, 2014, Rem. Ciò che resta, Luoghi e leggende di Pradleves, 2015, L’Arbouna la nosta, Narbona la nostra, 2017, Il mondo di Margherita, Volume I - Margherita e Volume II L’Ollasca, 2018.
Lo rescontre es organizat dal Centro Occitano de Cultura “Detto Dalmastro”, abo lo Patrocini d’la Comuna de Chastelmanh. Per informacions: redazione@lavousdechastelmanh.it, tel. 0171 986110.
Se continuarè puèi fins a junh abo tuchi lhi autres musèus Maraman. Lo calendari de rescontres, curat dai musèus e coordenaa da Espaci Occitan en collaboracion abo l’Union Montana Val Maira, es realizaa abo l’ajut d’la Region Piemont, e rapresenta decò una des accions d’la Carta Europea del Torisme Sostenible del Viso. Per informacions: Espaci Occitan de Draonier, tel 0171 904075, segreteria@espaci-occitan.org, Fb @museooccitano, Tw @espacioccitan.