Mostra personala de Lucia Norbiato
Lo chat, creatura enigmatica e independenta, traversa lìistòria de l’imaginari coma simbol d’libertat, elegància e mistèri. Abo LOU CHAT PITURÀ E PARLÀ, l’Espaci Occitan presenta la mòstra personala de Lucia Norbiato: un percors expositiu integrat qu’arramba a las òbras visualas una richa selecion de tèxtes literaris, una installacion vidèo e d’activitats participativas pensaas per far intervenir dirèctament lo public.
L’inauguracion es prevista per jòus 16 de julheta 18 orasa l’Espaci Occitan, en Via Val Maira 19 a Draonier, e l’installacion serà visitabla fins al 12 de setembre, en lhi oraris de dubertura del centre.
Lo nuclèu de la mòstra presenta de pinturas e calcografias realizaas da Norbiato en dètz ans. Dessenhs a enclòstre, pontas d’argènt e incisions abo tecnicas tradicionalas s’entreçon a d’experimentacions inovativas. Entre aquestas s’evidencion las Plagrafias, un procediment original creat da l’autritz ental 2021: la tecnica adòbra de matritz realizaas abo una stampanta 3D que generon estampas ren establas e totjorn diferentas. Lo siu estil a la fòrça d’un senh essencial, fluid, de bòts esgrafinhat, bòn a culhir la preséncia viva e inquieta de la bestia entre l’èsser domestia e fidèla e sa natura ren domaa. La mòstra presenta decò un leporello estampat en 100 còpias numeraas, que documenta una part des òbras, una incision originala, e la publicacion des quatre premièras estampas d’una nòva colleccion intitulaa Bestiari per las edicions Doùos. Las òbras buton ensemp incisions e tèxtes literaris dins las parlaas del territòri occitan e piemontés abo traduccion italiana, estampaas a caractèrs mobils abo tòrch Vandercook.
La paraula e la figura van en bracèta a travèrs un contribut vidèo dins la seccion Chats d’autor. Un espaci, curat da Rosella Pellerino, Director Scientific de l’Associacion, tot pensat per leser e escotar de tòcs de tèxtes e citacions d’escrivaires italians, occitans, piemontés e d’autras lengas, acompanhats da òbras pitòricas dedicaas al chat, abo l’intencion de crear un dialog coral entre art e literatura, a la recèrcha d’artistas del passat mas decò de poetas del nòstre temp e del nòstre territòri. Dins aqueste espaci lo public polerè devenir protagonista d’una experiéncia d’escrichura: lhi visitaires trobarèn un lòng fuelh de papier ente dessenhar o escriure, dins la lenga pus cara, pensiers e reflexions sus lhi chats.
Lucia Norbiato es laureaa en Arquitectura e Comunicacion Interculturala. La sia recèrcha artistica buta ensemp tradicion e experimentacion, entreçant tecnicas graficas e pitòricas ancianas abo d’instruments tecnològics d’encuei. Coerentement abo la sia formacion interculturala, la recèrcha literaria de Norbiato vòl evidenciar la varietat e la richessa des parlaas localas, decò gràcias a l’ajut d’experts de lenga de la Val d’Estura, e sobretot de la maire Renata Costa per la Val Pò.
Aqueste percors a generat las edicions Doùos, simbol editorial ideat da l’artista per evidenciar lhi elements cardinals de son trabalh: figura e paraula. Las incisions que companhon lhi escrichs an pas una foncion illustrativa o subordinaa, mas naisson sus de percors paralèls.
L’iniciativa es realizaa da Espaci Occitan abo lo sosten de la Region Piemont. Visitas a intraa libra e gratis; per informacions Espaci Occitan, Tel. 0171.904075, segreteria@espaci-occitan.org, Fb @museooccitano, Ig @museo.occitano.
Scarica la locandina QUI