Apontaments literaris en Val Maira 2020
Recomença en l’istaa 2020 LIBRES LIBRES, propòsta literaria d’Espaci Occitan realizaa emè lo sostenh d’la Region Piemont e dediaa a publicacions liaas a lenga, cultura e territòri occitans. Libres e cultura, ent’aquesti mes instruments extraordinaris per pensar, arrambar-se e sentir-se libres.
Venre10 de lulh del 2020 a 18 oras se comença emè Angela Delgrosso, ex astrònoma e ensenhaira d’matematica, creatritz a Saluces de Spazio Culturale Piemontese. Serè presentat Dal Rosa al Viso, publiat da Araba Fenice, istòria familiara autobiografica ambientaa en l’Uèch Cents entre lo Ròsa e Saluces, ente s’originen las doas branchas d’la familha de l’autritz; s’la cubertina es presenta la sia reire-reire-nòna ent’una pintura de Matteo Olivero. Apontament en collaboracion emè la libreria Passpartout de Caralh.
Venre 17 de lulh del 2020a 18 oras se parlarè de Il gergo dei canapini di Crissolo (Ed. dell’Orso) emè Matteo Rivoira e Aline Pons, curators d’la publicacion qu’arpilha part d’la tèsi d’laurea d’l’occitanista Gustavo Malan, realizaa ental 1940. Fins al principi del Nòu Cents en auta Val Pò lhi brustiaires baissaven en Piemont, Liguria o França per brustiar lo manolh d’charbo. Coma lhi chabeliers d’Elva e lhi pastres d’Roascha, avien decò lor una lenga segreta, dicha pantòis a Criçòl e grapiét a Ostana.
Venre 24 de lulh del 2020 a 18 oras apontament emè Italo Marino e son libre Storie d’I Tech de Drounê publiat dal Dragone. L’autor, originari d’la fraccion de Draonier, entre recòrds personals, contes e entrevistas, dessenha en l’occitan di Techs un retrach arbricolhut e estentós de lhi ans ’50 e ‘60, plens de nòtas istòricas e etnograficas. Lo libre es enrichit da un clau USB emè las istòrias lesuas da l’autor en lo dialèct di Techs. Se present Gianpiero Boschero, expert de tradiccions occitanas.
Venre 31 de lulh del 2020 a 18 oras lo publicista Ezio Marinoni presentarè son premièr romanç Il libro e l’affresco di Elva, Ed. Mille. L’istòria comença ental 1028 en l'Abadia d’Espinh ental Monferrat, arriba en las Langas ental procés ai Catars d’Montfòrt, trucha l'Abadia de Pedona e finìs en Val Maira 990 ans d’aprés, quora un vielh professor francés desrevela lhi secrèts del Libre del Comand e lo misteri de quora, ental 1512, seria despareissut lo pintre flamand Hans Clemer, lo magistre d’Elva.
Tuchi lhi rescontres, gratis, se passarèn en cò de l’Espaci Occitan a Draonier (ex Caserma Beltricco), ental respèct des règlas de prevencion del COVID19, de fòra o dedins emè pòsts assenhats e distanciats. Chal prenotar per poler partecipar. Polerè pas partecipar qui abie mai de 37.5 de fèure, e es obligatòri butar la masquerina.
Per informacions e prenotacions Espaci Occitan, Via Val Maira 19, 12025, Draonier, Tel. 0171.904075, segreteria@espaci-occitan.org Fb @museooccitano Tw @espacioccitan.