Dal 16 al 25 d’octobre a l’Espaci Occitan de Draonier
un viatge ental temp sus las peaas de Raimbaut de Vaqueiras
Ental 2028 serèn passats 1000 ans da la premièra atestacion escricha del topònim “val Maira” ental document de fondacion del monasteri benedetin feminil de Santa Maria d’Caramanha: ental percors per arrambar-se an’aqueste important moment, l’Associacion Espaci Occitan propon al public un viatge ental temp, quora l’occitan era la lenga de la circulacion culturala en Europa, e lhi trobadors portavon en vir lo parlar e lhi valors cortés.
Lo provençal Raimbaut de Vaqueiras, un di trobadors mai importants actius en Piemont, era arribat ental 1192 dins lo Marquesat de Bonifaci I del Montferrat, e aicì era restat onze ans. Après uèch sècols, eura torna protagonista en las nòstras tèrras gràcias a La setmana del trobador – Sus las traças de Raimbaut de Vaqueiras, una residença musicala e teatrala que se passarè a Draonier dal 16 al 25 d’octobre emè lo musicista medieval de Verona Matteo Zenatti. Ental 2022, Zenatti aviá ja seguit idealament lhi pas de Raimbaut en chaminant da Draonier a Casal Montferrat dins la performance Trovatore in transito, demandant ospitalitat en paga des chançons que proponia acompanhat da l’arpa.
Lo moment final de la residença serà un doble apontament sandre 25 d’octobre: a tres bòts e mètz, a l’Espaci Occitan, se passarè la taula rotonda Mot e son. La musica di trobadors, emè Francesco Carapezza, filòlog e musicòlog de l’Universitat de Palermo, que devisarè sus l’importança de la dimension musicala di trobadors; Andrea Giraudo, filòlog de l’Universitat de Turin, que presentarè la figura e las òbras de Raimbaut; Matteo Zenatti. A 18 oras, Zenatti serè protagonista del concèrt recitat en lenga d’òc Raimbaut de Vaqueiras. Vida e cansons. L’espectacle, escrich e interpretat da Matteo Zenatti, a la regia dePaola Tortora, actritz e dramaturga d’importança internacionala, fondatritz de Vintulera Teatro, emè la consulença filològica d’Andrea Giraudo e lhi costums de Gaetano Miglioranzi (duraa: 70 minutas).
Lhi jorns de residença permettarèn a Zenatti e a Paola Tortora de perfeccionar l’espectacle, que serè presentat per lo premièr viatge a Draonier, mas serè decò l’ocasion per far partecipar la populacion. Gracias a la collaboracion emè lo Departiment d’Estudis Umanistics de l’Universitat de Turin, Andrea Giraudo e Matteo Zenatti an en prevision de rencontres emè lhi estudents des escòlas e de lhi instituts musicals de la Val Maira per aprofundir lo tèma de la literatura medievala e de la musica trobadòrica.
Luns 20 e mars 21, da 17.30 a 19 oras, son previstas decò doas pròvas dubèrtasal public, que polerè assistir a la mesa en scèna de l’espectacle.
Jòus 23, da 18 a 20 oras, Trobem ensem, laboratòri musicalemè Matteo Zenatti per chantaires e sonaires, dubèrt a tuchi lhi instruments musicals, emè la collaboracion de Simonetta Baudino.
Totas las activitats – fòra que lhi rencontres emè las escòlas – se passarèn dins lhi locals de l’Espaci Occitan, Via Val Maira 19, Draonier, e l’intrada serè libra e gratis. Per l’espectacle e lo laboratòri musical, fai plaser la prenotacion.
L’iniciativa, organizaa da Espaci Occitan e patrocinat dal Departiment d’Estudis Umanistics de l’Universitat de Turin, fai part del programa Val Maira 28 mai 2028, realizat en collaboracion emè l’Union Montana Val Maira emè lo sostenh de la Region Piemont. Per informacions espaci-occitan.org e prenotacions segreteria@espaci-occitan.org, 0171.904075.
Scarica la locandina QUI