Cent ans de poesia occitana alpina abo lhi retrachs d’Ugo Giletta
Venre 19 de Sant Joan a 18 oras, a l’Espaci Occitan de Draonier serè inauguraa la mòstra permanenta La flor d’òc. Cent ans de poesia occitana alpina abo lhi retrachs d’Ugo Giletta. Lo liam entre lenga e art, ja explorat da l’Associacion dins lhi ans passats a travèrs de collaboracions abo pintres, escultors e istòrics de l’art, se conferma enca’ un bòt abo l’installacion d’una seccion expositiva nòva dins lo musèu Sòn de Lenga. Protagonista la poesia en lenga d’òc, abo 25 composicions d’autors e autoras contemporanèus actius en las valadas, dins una seleccion realizaa da la directritz scientifica d’Espaci Occitan Rosella Pellerino, e enrichia da retrachs dediats a de poetas ja mancats, realizats da l’artista italian Ugo Giletta e aquerits da l’Associacion. Originari d’Revèl, Giletta trabalha esquasi mec abo lo morre uman, e da la conoissença, decò personala, de quarque autor retrach, a sabut prener e portar dins las òbras expongua l’esprit e l’esséncia di poetas. Dins un viatge entre paraulas e morres, dal Monregalés fins a la Val Doira, son representats lhi principals e mai aimats poetas de lenga d’òc des valadas piemontesas: Barba Tòni Baudrier, Bep Ros dal Jove, Remigio Bermond, Piero Raina, Claudio Salvagno, entre aquelhi que nos an laissats, e puei Lucia e Adriana Abello, Giacomo Bellone, Graziella Vachet e ben d’autres.
L’istòric de l’art e escrivire unguerés Lorand Hegyi comenta parelh aqueste darrier trabalh de l’artista d’Revèl: “Aquelhi retrachs d’Ugo Giletta son pròpi bèls: son dessenhs que gardon l’expression e la personalitat de chasque poeta rapresentat. Naturalament, rapresenton pas lo siu percors artistic principal, mas son pas forestiers a son orizont d’enterés cultural. Dins aquesti retrachs, veu pas d’incoeréncia expressiva; al contrari, retròbo una possibla expansion de son trabalh, una sòrta de viatge dins la tèrra de sas originas, de sa joventut, quora Ugo Giletta a descubert l’importança de la literatura per son monde intellectual. Après aquesta parentèsi, siu segur que tornarè totun a son percors abitual”.
La mòstra es realizaa da l’Associacion Espaci Occitan abo lo sostenh de la Region Piemont.
Après l’inauguracion, a la preséncia de l’artista e de quarqu’un de lhi autors selecionats, lhi retrachs e las poesias serèn sempre en exposicion e se polerèn admirar dins lhi oraris de dubèrtura del Musèu Sòn de Lenga d’Espaci Occitan.
Per informacions Espaci Occitan, Via Val Maira 19 a Draonier, tel. 0171.904075, segreteria@espaci-occitan.org; www.espaci-occitan.org, Fb @museooccitano, IG @museo.occitano
Scarica la locandina completa QUI