Arriba en libraria a vingt ans da la traduccion italiana la nòva edicion d’un classic del pensier nacionalista de liberacion modern, Ethnisme. L’òbra del 1975 de François Fontan, en la traducion d’Antonio Rovera, era jà estaa publiaa ental 1998 abo lo titol Etnismo. Verso un nazionalismo umanista, e nòtas de Joan-Lois Veyrac: encuei l’editor Insula/Papiros, per gentil permés de l’Associacion Lou Soulestrei, lo propon en la colana “Osservatorio” entre lhi estudis relatius a las nacions e a las lengas que cerchon liberacion e oficialitat. Lo libre, curat da Diego Corràine e Fredo Valla, abo prefacion de Sergio Salvi, fai la distincion entre estat e nacion, presenta una classificacion des lengas e naccions negaas d'Europa e del monde, fai l’istòria des batalhas de liberacion nacionala. Completa aquesta edicion del libre una richa seccion de testimonianças di principals actors de la batalha occitanista ai temps de Fontan en las Valadas Occitanas en Italia: Vita de François Fontan de Dino Matteodo; «E i a lo solelh», un film sus François Fontan de Diego Anghilante; Que m’a donat François Fontan de Dario Anghilante; Se un pòpol vòl viure chal que lo merite de Sergio Berardo. E pròpi aquesti testimònis de la renaissença occitana serèn presents venre 8 de febrier p.v. a la presentacion de l’òbra, que se passarè a las 20.45 en cò de l’Institut d’Estudis d’Espaci Occitan a Draonier. En aquesta nòva edicion al libre de 154 paginas es alegat un DVD abo lo film-documentari del 1999 E i a lo solelh de Diego Anghilante e Fredo Valla, que serè proiectat aquela sera per mielh comprener la figura d’uno di paires de l’occitanisme en las valadas (63 minutas). L’intrada a la presentacion e a la proiecion è gratis.
La presentazione di Etnismo è un appuntamento di Libres libres - Libri liberi, rassegna che vedrà la presentazione di pubblicazioni legate al territorio occitano.
Info Espaci Occitan, Via Val Maira 19, 12025, Dronero, Tel. 0171 904075, segreteria@espaci-occitan.org Fb @museooccitano Tw @espacioccitan.