Serè presentat al public venre 26 de mai a 17.30 oras en cò de lo Spazio Incontri d’la Fondacion Cassa di Risparmio di Cuneo en Via Roma 28 a Coni il Grande Dizionario della Lingua d’Oc Alpina, ideat e curat dal Professor Sergio Maria Gilardino, qu’aprés aver mostrat literatura comparaa a l’Universitat McGill de Montreal s’es dediat a l’estudi des lengas del Piemont, sustot al walser e al piemontés literari. Lo projèct es estat realizat abo lo sostenh d’la Fondacion CRC d’Coni, que dal principi a cresut a l'emportança d’culhir e gardar un patrimòni linguïstic e cultural bigalhat, preciós e enca’ viu coma aquel des varietats occitanas alpinas orientalas.
Aqueste trabalh, començat ental 2008, es estat coordinat enti ans dal Comitat per lo Grand Dicionari d’la Lenga d’òc Alpina, presiedut da Aldo Pellegrino e format da estudiós e experts des varietats occitanas del Piemont, coma Gianpiero Boschero e Renato Lombardo; per la part finala s’es ajontat l’ajut de l'Associacion Espaci Occitan.
Lo premier resultat del projèct, qu’a culhit e collacionat mai de vint fonts escrichas e la realizacion d’una detzena d’entrevistas linguïsticas en de lueas ren cubèrtas da estudis escrichs, es la creacion d’un dicionari de passa 54.000 paraulas, que serè disponible, gratis, per la consultacion en linha sal site web espaci-occitan.org en format pdf, per recerchar de mots en nombrosas variantas d’occitan alpin. Una còpia sus papier del trabalh es gardaa en cò d’la biblioteca d’Espaci Occitan, disponibla per la consultacion tradicionala. Aquesta premièra part de catalogacion e recercha s’espera que polerè èsser integraa enti ans a venir da autras entrevistas e fonts jà culhias en de pòsts novèls.
Serèn presents a la presentacion lo President d’la Fondacion CRC Doct. Ezio Raviola, Michelangelo Ghio President d’Espaci Occitan, lo Prof. Sergio Gilardino curator del projèct, l’Avv. Aldo Pellegrino President del Comitat per lo Grand Dicionari d’la Lenga d'òc alpina, e l’Avv. Gianpiero Boschero, redactor d’la secion s’la grafia en conformitat a las nòrmas d’l’Escolo dóu Po.
Parteciparèn decò redactors, informators e entrevistators qu’en manièras diferentas, abo lor preciosa collaboracion, an contribuït a la realizacion d’aqueste important e util instrument per l’estudi e l’empleg des varietats d’la lenga occitana alpina.
La partecipacion es libra; fai plaser confermar a lo 0171.904075, segreteria@espaci-occitan.org.