Lo Percors-Juec es un projèct de valorizacion e descubèrta del territòri dediat a familhas abo mainaas.

L’idea es naissua da una cobla de fotògrafs, apassionats de promenadas en montanha: a Franco Voglino e Annalisa Porporato es sempre plasut viatjar en autonomia, apreciant lhi ritmes tranquils del chamin. Quora es naissua la pichòta Nora se son especializats en itineraris per familhas, proponent e provant de percors a mesura de mainaa e publiant guidas excursionisticas abo d’itineraris per lhi pus pichòts.

Lo Percors-Juec arriba en Val Maira gracias a l’Associacion Espaci Occitan, realizat abo lo sostenh d’la Region Piemont e d’la Fondazione CRT.

A travers lo Percors-Juec la Val Maira, en las cinq comunas individuaas per aquesta activitat, Draonier, Estròp, Elva, Chanuelhas e Pratz, se presenta ai toristas en manièra encharmanta e didactica, amusanta e originala, portant l’atencion e la curiositat des mainaas sus las causas pus caracteristicas del territòri.

Pr’aquò son estats creats de percors culturals/naturalistics/istòrics presentats coma juec.Chasque percors es autoguidat a travers un pichòt escartari que presenta la promenada abo de mapas e de domandas simplas per mainaas, que deven respondre fasent una enteressanta recercha sal pòst. Lhi Percors-Juec pòrton lhi visitators e descurbir las comunas de la Valada fasent amusar tota la familha! 

Lhi desplegants di cinq percors se pòlon trobar en cò d’Espaci Occitan e a l’Ofici Toristic de Draonier, e aquelhi de chasque percors son presents enti musèus Maraman e las estructuras aderentas al projèct PLUF! des rispectivas comunas.

Per informacions: Espaci Occitan, tel. 0171904075, segreteria@espaci-occitan.org, www.espaci-occitan.org, Fb @museooccitano, Tw @espacioccitan.