Nòvas

M. Olivero. I paesaggi dell’anima

A l’Espaci Occitan una exposicion sal pintre occitan.

A noranta ans da la mòrt del pintre Matteo Olivero, passaa tragicament a Saluces lo 28 d’abril del 1932, l’Espaci Occitan presenta ent’aquò siu l’exposicion fotografica M. Olivero. I paesaggi dell’anima, dediaa a nele e realizaa da la Comuna d’Paisana en collaboracion abo l’Accademia Albertina di Belle Arti d’Turin, la Citat d’Saluces e la Pinacoteca Matteo Olivero, abo lo sostenh de la Fondacion Cassa di Risparmio d’Saluces. L’exposicion documenta e en part descuerb mai l’activitat del pintre d’Acelh en Val Pò ental quadre de la granda producion realizaa da nele.

Matteo Olivero, naissut a Prat Reond d’Acelh ental 1879, ental 1896 arriba a Turin per frequentar l'Academia Albertina. Ental 1902 es mai a Acelh per se dediar a l’òbra que presentarè aquel an a la premièra Quadrienala d'Art d’Turin, Ultime capanne. Amìs de Luigi Burgo, fondator des cartieras, Olivero comença a frequentar Paisana entre 1923 e 1926, ans ente realiza de paisatges d’la val Pò a l’environ d’la centrala; serè pròpi l’òbra Il Po a Calcinere lo darrier quadre retrobat sal taurièr en l’estudi d’l’artista.

La mòstra presentarè las ambientacions e las pinturas de Matteo Olivero en val Pò, premièr passatge d’un projèct que voleria arproponer aquelhi Percors Oliverians que pareissen coma una propòsta d’enterés cultural e ambiental, que permettaria d’observar, dal pòst precìs ente Olivero estudiava en plein air, lhi mai bèls paisatges des valadas Pò, Varacha, Maira e Grana fina a Saluces e Coni.

La mòstra, viraa en occitan exprés per aquesta ocasion, serè inauguraa venres 29 de lulh a 18 oras en cò de l’Institut d’Estudis de l’Espaci Occitan en Via Val Maira 19 a Draonier, e se polerè visitar gratis fins al 24 de setembre, jòus e venres en orari 10-12 e 15-18, sande 10-12.

A l’inauguracion parteciparèn Antonio Musiari, Professor d’Istòria d’l’art antica a l’Accademia Albertina di Belle Arti de Turin e autor de nombrós libres sus l’òbra d’Matteo Olivero coma “I paesaggi dell’anima. Percorsi oliveriani in Valle Po” Fusta editore, Saluzzo 2022, que serè presentat ent’aquesta ocasion, e lo second volum d’la racòlta “Matteo Olivero. Un pittore nel suo contesto” patrocinat decò da Espaci Occitan, que sortarè fito; Emanuele Vaudano, Sergio Beccio e Marisa Argento, Sendic e Conselhièrs d’la Comuna d’Paisana; Agostino Forte, President d’la Fondazione Acceglio, Luca Siri, vicesendic d’la Comuna d’Acelh; Emanuela Prekalori Directritz artistica des iniciativas d’la Fondazione Acceglio dediaas a Olivero.

L’intrada a l’inauguracion e la visita d’la mòstra son libres e gratis; per informacions tel. 0171.904075, segreteria@espaci-occitan.org.