Libres sus o da las valadas occitanas
Abo la prima arriba mai, un bòt al mes, Libres libres - Libri liberi, lo propòsta de l’Associacion Espaci Occitan de Draonier dedicaa a publicions liaas a lenga e cultura del territòri occitan alpin.
Lo premièr apontament, venre 6 de març a 18 oras, aurè per protagonista Bàrnabo d’es mountanhes - Bàrnabo delle montagne, traducion en la parlaa d’en Blins d’la premièra òbra de Dino Buzzati, realizaa da Giovanni Bernard, Jeannot d’i Vielm, mancat ental 2021. Barnabo, jove gardabòscs, es lo premièr di personatges de Buzzati que atend, guinchant un jorn après a l’autre, lo clar que nais e se tupìs sus la montanhas, rapresentant l’esprit de l’atendre, ent’una narracion pendua entre sumi, gargavelhas e realtat. A presentar aquesta version, publicaa da Fusta e extraordinaria per lo lexic preciós e per la testimoniança en la parlaa d’un di pòsts mai caracteristics d’la Chastelada, serèn Gianni Bernard, nebod de Jeannòt, e Tiziana Gallian, cultritz de la valada e poetessa.
Venre 10 d’abril a 18 oras trucharè a L'aizounenc. Dizionario etnolinguistico dell'occitano di Aisone de Andrea Celauro, Ed. dell’Orso. Publicat ental 2025, mas fruch de mai de dtez ans de recerchas, aquel de Celauro es ben mai d’un dicionari: es un viatge a travers l’essença linguística e culturala d’Aison. A las 9.000 paraulas se companhon una secion de descripcion morfològica e sustot una part etnografica, realizaa dal jove antropòlog a travèrs una recèrcha directa per fornir una vision integraa d’la lenga, d’la sia estructura e de son profond rapòrt abo la vita quotidiana d’la comunitat qu’encara encuei la parla. L’autor n’en parlarè abo Rosella Pellerino.
Venre 15 de mai a 18 oras, serè lo bòt de La danso dal farò. Poesie “a nosto modo” de Giacomino Genti, dich Giacomino dal Ferie, publicat da Fusta. La prefacion de l’òbra, firmaa da Diego Anghilante, lo descriu coma “una votz esclenta e pura, bela si fai pas part de la “civiltat literaria”, mas que pròpi pr’aquò es un miralh fidèl d’la societat e d’la cultura d’encuei en nòstras valadas”. Escrichs en la varietat occitana d’Rore en Val Varacha, lhi vers son espression d’un esprit gentil, qu’a sabut gardar e passar, despièch l’emigracion a Niça, o benlèu pròpi gracias a n’aquò, lo ligam profond a sias raïtz e a sia tèrra. Serèn presents abo l’autor l’occitanista e escrivaire Diego Anghilante e lo curator de l’òbra Piero Dematteis.
L’activitat es realizaa abo lo sostènh de la Region Piemont. Lhi apontaments se passarèn en cò de l’Espaci Occitan, en Via Val Maira 19 a Draonier; l’intrada es libra e gratis; per info tel. 0171.904075, segreteria@espaci-occitan.org, www.espaci-occitan.org, Fb @museooccitano, Ig @museo.occitano.
Scarica la locandina QUI