Lo teatre en lenga d’òc
Après l’apreciament recebut da lhi espectacles en e sus l’occitan proponguts dins lhi ans passats, per abril l’Espaci Occitan de Draonier torna mai abo un pichòt calendari teatral.
Se comença sande 18 d’abril a 21 oras abo Qui sotto / Aquì de sot, recitat en l’occitan d’Moiòla da la Companhia I Senzatesta, sot la direccion de la regista e actritz Elena Bosco de la companhia La robe à l’envers. I Senzatesta son lhi participants al Laboratòri Teatral dal projèct 2023 Montagna Futura de la CRC. Protagonista del “conte societal” es un fach ben conoissut dins las valadas: la granda chalanhaa de Bergemolet que lo 18 de març del 1755 avia cubèrt la ruaa d’Demont, maçant ben d’abitants e laissant isolaas dins un estable doas fremas, dui mainaas e quarquas bestias, qu’eron arribaas a sobreviure quaranta jorns. Lo tèxt, ja rapresentat en italian, dins l’istaa 2026 serè portat decò en la francesa Ramatouelle; es estat escrich da lhi actors Caterina Stella, Ferruccio Bernardi, Lucia Bruno, Marco Bruno, Marina Girodengo, Marinella Vassallo, Piera Perotto e Remo Degiovanni, abo l’ajut d’Elena Bosco, Alma Armando e Maddalena Forneris. Es decò una ocasion per repensar a la question ecològica dal rapòrt entre l’òme e lo territòri, e a las dinamicas de conflicte, poder e cooperacion que caracteríson la societat. Duraa 60’.
Lo jòus 23 de d’abril a 21 oras trucharè a Lu malate imaginari, adaptament e traduccion en occitan de la famosa òbra de Molière, presentaa da la companhia Mot à mot de Rore en Val Varacha, abo la regia de Paul Lecoq. La companhia es naissua dins lo grop que se reünís totas las setmanas abo l’ex professor Lecoq per aprener e perfecionar lo francés. Après aver rapresentat l’òbra en lenga originala, es naissua la traduccion corala en occitan, qu’es estaa representaa decò al Festival dal Teatre Provençal de Fuveau, ente a ganhat lo prèmi per lo trabalh didactic, per l’interpretacion femenila (a Tiziana Gallian) e lo prèmi dal public. Rapresentarèn la comèdia satirica de l’ipocondriac Argante, entre engans e astúcias: Enrica Barale, Andrea Dematteis, Giacomino Dematteis, Mauro Dematteis, Emanuela Fina, Barbara Gallian, Tiziana Gallian, Michele Gianaria, Roberto Paleni. Presentacion e scenografia: Anna-Lia Clerici; tecnic son e clars: Stefano Aimo. Duraa 60’.
Lhi apontaments, que fan part dal projèct Sòn de Lenga 2026 sostengut da la Region Piemont, se passarèn a l’Espaci Occitan en Via Val Maira 19 a Draonier e son tuchi a intrada libra e gratis. Per informacions tel. 0171.904075, segreteria@espaci-occitan.org, www.espaci-occitan.org, Fb @museooccitano, Ig @museo.occitano.
Scarica la locandina QUI