Nòvas

​​​​​​​Aliénor d’Aquitania

Lhi 900 ans de la neboda de Guilhèm de Peitieus

En ocasion di vingt’ans da l’inauguracion de l’Institut d’Estudis Occitans e del Musèu, l’Espaci Occitan de Draonier e l’Union Montana Val Maira proponon de moments culturals dediats a la lenga e a la literatura occitana.

Lo second apontament de jòus 14 d’abril a 18oras en cò de l’Institut d’Estudis de l’Espaci Occitan, en Via Val Maira 19 a Draonier aurè per protagonista Andrea Giraudo, Doctor de recèrcha en “Filologia e critica” a l’Universitat de Siena e a l’École Pratique des Hautes Études-PSL Paris. Recèrchaor en Filologia romana a l’Universitat de Turin, s’òcupa sustot d’antica literatura vaudèsa, laudas de Iacopon da Tòdi, trobadors e textes morals del Dui Cents francés; es decò membre de l’International Medieval Sermon Studies Society, d’la Società di Studi Valdesi, de l’AIEO – Association Internationale d’Études Occitanes, d’la Société de Linguistique Romane, d’la Société de Langues et de Littératures Médiévales d’Oc et d’Oïl e d’la Società Italiana di Filologia Romanza.

Ental rescontre de Draonier lo filòlog presentarè la figura fòravia d’Aliénor d’Aquitania, naissua a Bordèu ental 1122. Nessa del trobador Guilhèm de Peitieus, era duquessa d'Aquitania e Gasconha e comtessa de Peitieus. Ental 1137 deven reina de França, e dal 1154, après lo mariatge abo Enric de Lancastre, reina d'Angleterra e maire de Richard Còr de Lion. En la sia lònja vita (muerarè ental 1204) sostenarè d’importants autors coma Robert Wace, lo trobaire Benoît de Sainte-Maure e lhi trobadors Jaufré Rudel e Bernart de Ventadorn.

L’iniciativa fai part del projèct de l’Union Montana Val Maira financiat da la Presidença del Conselh di Ministres dins l’encastre del programa d’entervents prevists da la Lei 482/99 coordinat da la Region Piemont.

La partecipacion es gratis, mas chal prenotar al numre 0171.904075 o via mail a segreteria@remove-this.espaci-occitan.org.