Una exposicion-percors dediaa a la cultura e a la musica occitana
Serè inauguraa jòus 27 de junh del 2019 a 18 oras en cò de l’Espaci Occitan la mòstra Dandelion: temp de borrèa.
Es un projèct ideat da Espaci Occitan e La Fabbrica dei Suoni que nais dai dessenhs de Elisa Talentino, inlustratritz conoissua etal monde entier que ista e trabalha a Turin, desvelopat fins a crear un ver viatge ental monde d’la musica occitana entre lhi instruments e las danças caracteristics, las flors e las bestias qu’an inspirat l’artista, e decò ental monde cultural e linguístic occitan, fil ros de tuchi aquesti arguments. La visita deven parelh una experiença sensoriala, que jonh elements de linguística, botanica, mitologia, antropologia, per estudents, toristas, dançaires e musicistas, apassionats de cultura locala.
Elisa Talentino dessenha aquestas òbras après un viatge entre lo departiment des Autas-Alps e la provincia d’Coni, a quora coneis las anticas danças de la cultura occitana, qu’aquì encara encuei son al centre de rescontres e fèstas, e que devenon protagonistas d’la sia recercha qu’ental 2017 pòrta a la realizacion d’l'animacion Dandelion. L'artista pintura a l’aigarèla mai de mila taulas que puèi venon montaas per animar dui balarins que, coma ent’un ritual entre calenhaires, s’arrambon, se descòston e se truchon sus las nòtas d’una borrèa a dui temps, escricha exprés da la violoncellista Julia Kent e inspiraa a la musica tradiccionala occitana. Lo solet element que pareis entre lhi dui còrps que balon es una flor simpla e comuna que nais a la prima: lo virasolelh (en anglés Dandelion que ven dal francés Dent-de-lion): la tradiccion popolara di que fasent volar las sementas dal soflon sie possible realizar un sumi d’amor.
Una animacion esmoventa e poetica, producha da Airelles e qu’a ganhat ben de prèmis, coma la Gold Medal 3x3 Mag al Professional Show de New York, e qu’a estonat Espaci Occitan e La Fabbrica dei Suoni, qu’an realizat lo projèct “Dandelion: a temp de borrèa”, per crear un percors mai articulat a integracion de la vision di dessenhs e d’l’animacion Dandelion.
Realizaa abo lo sostenh d’la Fondacion CRC, d’la Region Piemont e d’l’espaci cultural Mutty de Castiglione delle Stiviere, la mòstra jà apreciaa ongan a Venascha arriba eira a l’Espaci Occitan, ente se polerè visitar gratis fins al 28 de setembre del 2019 en lhi oraris de dubertura de l’Institut d’Estudis Occitans (mercre 15-18, jòus e venre 9-12 e 15-18, sande 9-12).
Per informacions contacta-nos!