Ental 2026 l’Espaci Occitan de Draonierpropon mai lo cors de premier livèl de lenga e cultura occitana alpina en linha. Lo tutor ajuarè en linha lhi escolans, que polerèn partecipar quora pòlen, da pc, tablet o smartphone: la plataforma serè duberta h 24 dal 5 de març al 30 d’abril.
Lo cors propon una alfabetizacion elementara en 6 lecions abo d’elements de lectura, escrichura, gramatica, ortografia, fichas gramaticalas, file sonòrs, diccionari fondamental, exercicis de valutacion. Lhi escolans polerèn seguir las lecions sus una plataforma exprés, ente trobarèn las lecions, sempre disponiblas; en pus, serèn organizats de periòdics rescontres concordats en linha, sus Meet, entre tutor e la classa, per far conversacion e devisar sus de questions de gramatica. Lhi rescontres se passarèn lhi luns 9-16-23-30 de març en orari 19-20, mas serèn registrats e disponibles per qui porguesse pas seguir ent’aquelhi jorns.
Lo cors es gratis e dubèrt a tuchi: estudents, ensenhaires, operators toristics, apassionats, bèla si parlen pas occitan o viven pas en las valadas occitanas.
Per l’activacion serèn enviats Userid e Password dal Tutor lo 5 de març: aprés chasqu’un, per son cònte, polerè continuar emè son ritme.
L’occitan alpin adobrat serè aquel meridional (valadas de Coni), e la grafia aquela classica, mas chasque escolan polerè partecipar embè la sia varianta, portant son contribut enteressant.
Las iscripcions devon arribar drant del 28 de febrier per mail a segreteria@espaci-occitan.org marcant Nom e Conhòm, Luec e data de naissua, Residença, Telefon, email, livel da frequentar.
Stotomn serè organizat lo tradicional cors de premièr livèl en presença.
Lo cors fai part del projèct Sòn de Lenga sostengut da Fondazione CRC e Region Piemont.
Informacions c/o Espaci Occitan, tel. 0171.904075, www.espaci-occitan.org, segreteria@espaci-occitan.org.