La premiaa tragedia occitana de Diego Anghilante continua a virar per las valadas

Arriba en Val Sant Martin, a Pomarèt, lo vir de la tragedia en lenga occitana Bastian Nevacho de Diego Anghilante. L’òbra, presentaa al concors “Premi per un texte teatral en las lengas del Piemont” e premiaa da la Region Piemont ental 2011, serè rapresentaa venre 27 de setembre del 2019 a 21 oras en la sala Teatre Vaudés en Via Carlo Alberto, en ocasion des “Jornaas des lengas minoritarias” d’l’Escòla Latina. Lo texte, premiat ental 2011 decò en la seccion teatre del Gran Jo Flourau del Felibrige francés, es estat publiat ental 2012 dal Centro Studi Piemontesi de Turin sensa jamai èsser rapresentaa fins que, ental 2018, l’autor abo quarque actor amator e mairelenga des valadas Estura e Grana a decidut de presentar al public l’òbra teatrala.

Gracias a Espaci Occitan, e abo l’important sostenh de la Region Piemont, es naissut lo Teatre de la fiour per l’adaptament de BastianNevacho. S’es cernut de presentar una seleccion de passatges, liats da la votz de l’autor que, en italian, es lo narrator que companha entre las diferentas scenas.

Bastian (Sebastiano Degiovanni, dich Nevacho per sobriquet de familha) es un “marrit” que ista ent’un paìs des autas Valadas Occitanas al principi de lhi ans ‘70, quora l’emigracion e lo parelh dich progrés esbrison per sempre la societat d’la civiltat alpina. Bastian, lingièra de mesa etat que viu entre rebellions chumias, chocas e prepotenças sensa capir aquò que se passa dedins e dentorn a nele, es un perdent, e sa vita es dominaa, coma ent’una tragedia antica, da la mòrt, dal torment e da un destin sensa sens. Lo drama trucha un argoment delicat ent’una lenga occitana preciosa, que mescla paraulas anticas e rafinaas a autras grossièras e popolaras, ente s’entreçon lhi registres dramatic e realistic. Da part d’Espaci Occitan, un novèl empenh en la valorizacion de la lenga e de la cultura occitana a travèrs lo teatre, forma d’art pas talament propongua en las valadas.

L’intrada es gratis. L’òbra teatrala es pensaa per un public adult e preparat a una istòria dramatica.

Regia e votz narranta Diego Anghilante; actors Claudio Franco, Manuela Damiano, Marco Parola, Guido Garnero, Luciana Ortu.

L’iniciativa es realizaa abo la collaboracion de l’Associacion “Amici della Scuola Latina”e d’la Comuna de Pomarèt, e es una anteprima des Jornaas d’l’Escòla Latina dediaas a las lengas minoritarias del jorn d’aprés, sande 28 de setembre, qu’a en programa un laboratòri de paleografia, un convenh sus lhi documents en occitan ental bas Medioevo e en la premièra etat moderna des Alps Occidentalas e lo ser un concert de chants tradiccionals. Coma tuchi lhi ans la diamenja serè dediaa a la cultura materiala, abo l’inauguracion d’la mòstra “L’industria tessile in Val Chisone”.

Descharja lo MANIFESTIN e l'ARTICLE