Nòvas

Bartavelear - Per rire en viatge a nòsta mòda #valdEtura

Istòria en occitan abo Claudio Franco.

Arriba mai en Val d’Estura, aqueste viatge a Pontbernard de Peirapuerc, l’espectacle de Claudio Franco, poliedric actor amatorial d’Aison, actiu da una detzena d’ans e darrierament protagonista principal d’la tragedia occitana Bastian Nevacho de Diego Anghilante.

 

Bartavelear es un espectacle legier, fach de quadres, batuas, istòrias contaas da parents e compaisans, quarqu’una tradiccionala, autras enventaas da la fantasia de Claudio o escrichas da autres autors, coma l’imaginari discors del Viscomt Bolleris d’Demont, per sorire a la bona a travers la comicitat a nòstra mòda.

 

En occitan bartavelear vòl dir chacharar sec, ganassear volentier, e venaria da la bertavela, la pernitz rossa (Alectoris rufa) conoissua per son vers fòrt e sensa sosta, qu’auria inspirat decò lo nom del bartavel, pichòt intrument que fasia bautear la grilha de l’enventaor, fasent un bruch enoiós e repetut.

 

E d’segur manca pas la bertavela a Claudio Franco, qu’abo aqueste espectacle arpilha la dralha de Reclam, cabaret presentat passa quarque an en las valadas. A far da espala a l’actor aqueste viatge serè Manuela Damiano.

 

L’espectacle se passarè sande 5 d’novembre 2022 a 21 oras en cò de l’Ecomusèu di Pastres d’Pontbernard, Peirapuerc. L’intrada es libra e gratis.

 

L’iniciativa es realizaa da Espaci Occitan abo la collaboracion de l’Union de Montanha Val d’Estura e de l’Ecomusèu di Pastres.

 

Per info: Espaci Occitan, www.espaci-occitan.org, segreteria@espaci-occitan.org, Fb @museooccitano, Tw @espacioccitan, IG @museo.occitano, tel 0171904075.