Nòvas

Avost al Sambuc

Apontaments, cultura e istòria al Centre de Documentacion Val d’Estura

Decò aquesta istaa l’Associacion Espaci Occitan de Draonier presenta un calendrier d’apontaments naissut da la collaboracion emè la Comuna del Sambuc e lo Centre de Documentacion Val d’Estura, per valorizar l’istòria e la lenga locala e donar visibilitat al Centre de Documentacion, qu’emè sias collecions es una resorça preciosa pas mec per son paìs, mas per tota la Val d’Estura e lo territòri occitan. Lhi apontaments, tuchi gratis, se passarèn en cò del Centre Documentacion Val d’Estura, Via Umberto Primo 50/A al Sambuc.

Premier rescontre Venre 9 d’avost a 18 oras emè l’inauguracion d’la mòstra Lhi trobadors en Piemont, naissua da una recercha realizaa ental 2012 da Rosella Pellerino, Director Scientific d’Espaci Occitan e deventaa exposicion permanenta a Draonier. L’exposicion presenta la producion poetica en occitan ental Piemont del 1200, quora de famós trobadors arribon en las principalas corts localas: ental Monferrat Raimbaud de Vaqueiras, Peire Vidal e Aimeric de Peguilhan, e ental Piemont meridional, en cò di senhors del Carretto, Bernart de Bondeilhs e Peire de la Mula. Decò un pichòt grop d’aristocratics piemontés pròva a componer en lenga d’òc: entre aquesti Tommaso II de Savòia, Manfredo I Lancia di Busca, e lhi Marqués de Saluces protectors de Peire Guilhem de Luserna e di turinés Nicolet de Turin, Enchantarel e Trufarel. A l’inauguracion seguirè una pichòta conferença d’la curatritz e un aperitiu ofert da la Comuna.

En lhi oraris de dubertura d’l’exposicion serè deco possible visitar, al plan dessot, la mòstra permanenta Las baias d’la Val d’Estura emè una richa documentacion fotografica, vestas e istruments liats a n’aquesta antica tradiccion presenta en tot lo territòri occitan alpin e enca’ viva al Sambuc e a Festiona d’Demont. Las doas mòstras se polerèn visitar gratis fins al 31 d’avost del 2019 venre, sande e diamenja en orari 16.30 – 19.30.

Jòus 22 d’avost a 21 oras presentacion del libre Valle Stura, Guida a una valle di confine: un affascinante mondo tra due mondi justa surtit da Più Eventi Edizioni. Un autre titol per la racòlta de guidas de torisme cultural e excursionistic en las valadas de Coni: un instrument novèl, unic e preciós, per descurbir una des mai encharmantas e bigalhaas valadas del Piemont. A la presença de lhi autors, gachant de fotografias, serè propongut un viatge per la valada da la plana al confin, emè particulara atencion per la Comuna del Sambuc e sias caracteristicas artisticas, naturalisticas, istòricas. Serè possible chatar lo libre.

Per finir Jèus 29 d’avost a 21 oras apontament emè Made in oc de Rosella Pellerino. Invencions e personatges occitans: grands noms coma Cèzanne o Agnelli, trobaas universalas da la comuna raïtz occitana coma Limousine, margarina e Pastìs. Conferença semiseria per grands e pichòts.

Per informacions Comuna del Sambuc, 0171. 96633 - info@comune.sambuco.cn.it - www.comune.sambuco.cn.it, Espaci Occitan - tel. 0171904075 – segreteria@espaci-occitan.org – www.espaci-occitan.org, Fb @museooccitano, Tw @espacioccitan.

 

Descharja lo MANIFESTIN e l'ARTICLE